Kèk bagay nou dwe konnen sou Santorini

Depi kèk jou, Santorini an bikini se non yon nouvo challenge ki anvayi rezo sosyal yo, sitou

Instagram ak TikTok. Challenge sa a mete an sèn yon latriye jèn fi, ki nan yon seri videyo tou kout, ap danse an bikini sou son yo mizik ki titre « Santorini ».

Nan kòmansman videyo sa yo, medam abiye nòmal epi yo kòmanse danse pandan yo gen nan men yo bous oswa kat bank yo bay yo. Yon ti tan apre, tout rad vole gagè epi ou wè yo ak bikini. Epi, sa w tande a, se gouyad kap tonbe.

Menm si avi yo pataje sou li, jèn fi nan plizyè peyi gentan angaje yo nan Challenge Santorini an. Genyen deja prèske 4 milyon moun ki gade videyo challenge lan e genyen anviwon 50 000 moun ki gentan fè videyo nan kad challenge lan.

Mizik ki dèyè challenge sa a se «Santorini».

Atis gwadloupeyen Gamma Lab sòti mizik sa a nan dat 15 septanm 2021 an men se gras ak challenge lan plis moun dekouvri mizik la.

Mizik Gamma Lab la pote non yon zile nan peyi Grès.

Santorini fè pati gwoup zile «Cycladiques» yo ki gen ladan yo Mykonos , Milos, Ios, Naxos, Paros, Antiparos , Delos, Amorgos, Tinos, Andros, Sifnos, Sefiros, Folegandros, Syros (kapital achipèl la), elatriye. Achipèl la genyen plis pase 2 000 moso tè men se sèlman 25 zile ki gen moun kap viv sou yo. Gwoup zile « Cycladiques » yo twouve to nan zòn sid peyi a, ant Athènes ak Crète (yon gwo zile).

Santorini resevwa non sa a pandan 13 zyèm syèk la, lè sa anpi bizanten an te tonbe anba dominasyon latin. Non zile a se yon defòmasyon Santa Irene ki se sen patwon zile a. Chapèl bizantin Santa Irene a egziste jiskaprezan. Santorini se yon zile vòlkanik. Sa lakoz li gen yon

pakèt plaj nwa. Nan ane 1600 avan Jezi-Kris, yon eripsyon vòlkanik detwi zile epi chanje figi l konplètman.

Santorini pa sèlman genyen plaj nwa. Li gen yon plaj wouj tou. Plaj sa a twouve l tou pre sit akewolojik Akrotiri a. Plaj sa a nan mitan de (2) falèz wouj se sa ki fè yo rele li Plaj Wouj la. Nou jwenn tou sou zile a yon plaj blanch, plaj sa a sanble tèt koupe ak plaj ki genyen nan zòn Karayib la.


Pou anpil moun, Santorini se kote ki pi womantik nan peyi a. Se modèl andwa tout moun ta dwe vizite omwen yon fwa nan vi yo.

 

Premye Kondisyon Sanmim: fòk ou gen viza oswa rezidans brezil la