Èske w te konnen ke se pa premye fwa ayiti te gen 2 prezidan an menm tan?



Dimanch 7 fevriye a, aprè anpil sektè nan vi nasyonal la fin konstate fen manda prezidan Jovenel, opozisyon politik la nan tèt kole ak sektè prive a nome Joseph Mécène Jean-Louis, pi ansyen jij Lakou Kasasyon an prezidan pwovizwa. Sa ki ta vle di nan moman nap pale a Ayiti gen de (2) prezidan paske Jovenel Moise, ofisyèlman, pakite pouvwa a.


Yon evènman konsa te repete nan peyi a sa gen 20 lane. Aprè l’ fin ranpòte eleksyon konteste 26 novanm 2000 yo, Jean-Bertrand Aristide te dwe prete sèman 7 fevriye 2001. Pati nan opozisyon ki pat rekonèt viktwa Aristide la akoz iregilarite ki te genyen nan eleksyon yo pral regwoupe yo nan yon pati inik yo te rele Convergence Démocratique. Nan menm moman prestasyon sèman Aristide la, Mèt Gerard Gourgue, prezidan Convergence Dèmocratique la te deziye a, tap prete sèman li menm tou nan lokal Konvèjans lan nan zòn Bwavèna.

Nou pap twò chita sou ka Mèt Gourgue la paske li plis sanble yon bagay senbolik. Nap remonte pi lwen nan istwa nou pou nou wè tras yon evènman konsa.

Nou tout konnen sa ki te pase 17 oktòb 1806. Aprè yo fin touye papa nasyon an, Petion ak lòt milat yo redije prese prese yon konstitisyon ki aboli monachi a, tabli yon Repiblik ki gen nan tèt li yon pouvwa egzkitif. Selon sa konstitisyon sa a te prevwa, prezidan an ki te eli pou 4 lane pat gen plis pouvwa ke yon kaporal alòske Sena a ki te reprezante pouvwa lejislatif la te tou pwisan.